Piggdekkgebyret er oppheva

Gebyr på piggdekk er oppheva

I kommunestyret 25. september 2023 vart piggdekkgebyret i Stavanger oppheva. Frå 2017 har dei som har køyrt med piggdekk betalt eit gebyr. Vinteren 2022/23 var siste sesong med piggdekkgebyr.

Piggdekkgebyret vart innført som eit luftkvalitettiltak for å redusera piggdekkbruken, og gebyrordninga var heimla i ei lokal forskrift. For å oppheva denne forskrifta måtte ho på høyring før Stavanger kommune søkte om å få den oppheva. Vegdirektoratet godkjende søknaden før opphevinga vart endeleg vedteke 25. september.

Talet på piggdekk halverte

Statens vegvesen har gjennomført piggdekkteljingar i byområdet Stavanger/Sandnes kvart år sidan 2001. I løpet av denne perioden har andelen piggfrie vinterdekk auka frå 68 til 91 prosent. 

– Piggdekkgebyr har vore eit veldig effektivt verkemiddel for å redusera piggdekkbruken og såleis redusera mengda svevestøv i lufta. Etter at gebyret vart innført i 2017, er piggdekkbruken meir enn halvert i Stavanger, fortel Jane Nilsen Aalhus, miljøvernsjef i Stavanger kommune.  

Les meir om førre teljing av piggdekk i byområdet Stavanger/Sandnes her.

Kor stort var gebyret?

Piggdekkgebyret var på:

• 1400 kroner for heile vintersesongen, frå og med 1. november og fram til måndag éi veke etter påske
• 450 kroner for ein kalendermånad
• 35 kroner for eit døgn. Dette kjøpte ein frå 1. november, og det gjeld i 24 timar frå betalingstidspunktet
• Storleiken på gebyret er fastsett av sentrale styresmakter. Det var det same også i Bergen, Oslo og Trondheim.

Kva gjekk pengane til?

Inntektene frå gebyret gjekk inn i eit klima- og miljøfond, og vart brukte til tiltak for reinare og friskare byluft:

• 6,3 millionar kroner har vorte gitt i støtte til rundt 1300 bustadeigarar som skifta ut gamle vedomnar med nye, reintbrennande eldstader.
• Gebyrpengar går også til ekstra reinhald på kommunale vegar med mykje trafikk om vinteren, for å avgrensa svevestøv i lufta. 200 000 – 400 000 kroner per vintersesong.
• Det er kjøpt inn 50 fleire bysyklar og 100 bysykkel-ladestasjonar, som gjer det lettare for folk i Stavanger å komma seg raskt og greitt på kryss og tvers i kommunen utan bil.
• 3 millionar kroner frå piggdekkgebyret har gått til støtte til mange burettslag og sameige i Stavanger som legg til rette for lading av el-bilar.
• 1 millionar kroner av gebyrpengane finansierer  støtteordning til mellom anna bedrifter og barnefamiliar  som vil bruka el-lastesyklar i staden for bil til transport i Stavanger.
• I 2021 gjekk omtrent 250 000 kroner gjekk til eit samarbeidsprosjekt med Naturvernforbundet for at fleire skal ta i bruk solenergi. 
• I 2022 vart det løyvd pengar frå fondet til ei støtteordning for installering av varmepumper i private bustader.